Qurban Qurbanov: "Sabahdan axşama kimi bununla məşğul olacağam"

"Qarabağ"ın baş məşqçisi Qurban Qurbanov "Metallurq"a qarşı keçirilən oyunu şərh edib. Futbolxeber.az-ın məlumatına görə, təcrübəli mütəxəssis hər şeyin istədikləri kimi olduğunu bildirib: "Metallurq"un 3 il öncə ilə müqayisədə nəticəyə oynayan komanda olduğunu demişdim. Bunun şahidi oldunuz. Rəqib sonadək uduzmaq istəmədi. Ancaq şükürlər olsun ki, hər şey istədiyimiz kimi oldu. Leroy Corc qol vursa da, onun hazırlığı hələ məni tam qane etmir. Çünki komandaya gec qoşulub. Nikoloz Gelaşvili qol vurmasa da, onun həmin vəziyyətlərdə olmağı hücumçu kimi ustalığını göstərir. Sadəcə, onda qol çatmırdı”.

Qurbanov növbəti rəqib “Pyast”ı belə dəyərləndirib: “Açığı, bu komandanın heç bir oyunu izləməmişəm. Fikrimcə, bütün diqqətimizi “Metalluq”la oyuna yönəltməklə düzgün addım atmışam. Sabahdan “Pyast” haqda informasiya toplayaraq, axşama kimi bununla məşğul olacağam. Azarkeşlərdən həmişə razı qalmışıq, sadəcə, istefa qışqıranda yox (gülür)”.