"Rəvan"da "gücləndirilmiş rejim"

"Rəvan” yeni mövsümə hazırlıqlarını davam etdirir. Futbolxeber.az-ın məlumatına görə, komanda bazar ertəsi baş tutan bərpaedici məşqdən sonra "gücləndirilmiş rejim”lə çalışır. Gündə 2 dəfə məşq edən futbolçular bugünkü səhər məşqində əsasən fiziki hazırlıq üzərində çalışdı. Müxtəlif maneələri dəf etməklə müəyyən olunmuş məsafələrə qaçan oyunçular eyni zamanda fiziki çalışma üzrə ənənəvi təmrinləri də yerinə yetirdi.

Axşam məşqində isə texniki-taktiki hazırlıq ön plana çıxdı. Baş məşqçi Ramil Əliyev yetirmələrinə dar sahədə pressinq altından çıxmaq üzrə xüsusi tapşırıqlar verdi. Təxminən saatyarım davam edən məşqdə oyunçular ənənəvi "kvadrat” üzrə də çalışdılar. Bir toxunuşlu ötürmələrlə topu özündə saxlamağa yönəlik hərəkətlər isə bütün oyunçuların lap ürəyindən oldu. Məşqin sonunda komanda üzvləri cinah asmaları və onların qapanması, eləcə də qapıya zərbələr üzərində işlədi.

Qeyd edək ki, hərbçilər arasında keçirilən I dünya çempionatında millimizin şərəfini qoruyan 6 futbolçunu saymasaq, heyətlə bağlı problem yoxdur. Belə ki, yüngül zədələri olan qapıçılar Lukaş Sapela və Fuad Əhmədov, eləcə də dizindəki ağrılara görə bir müddət "istirahət edən” Şəhriyar Rəhimov bütün komanda ilə ümumi qrupda məşqdə iştirak etdi.