“Neftçi”nin legioneri: “Bunun bizə çox köməyi dəyəcək”

"Neftçi” Topaz Premyer Liqasının XVIII turu çərçivəsində qarşılaşacağı "Sumqayıt”la oyunun hazırlığını ötən gün başa vurub. 

 

Futbolxeber.az-ın məlumatına görə, “ağ-qaralar” "Bakcell Arena”da məşq edib. Məşqdən sonra komandanın ispaniyalı hücumçusu Daniel Seqoviya klubun rəsmi saytına açıqlama verib:

 

"İnter”ə qalib gələndən sonra komandada özünəinam yaranıb. Sabahkı oyunda bunun bizə çox köməyi dəyəcək. Əvvəlki oyuna hazırlaşdığımız kimi, bu görüşə də yaxşı hazırlaşmışıq. Aqressiv olub, qələbə qazanmaq lazımdır. Azarkeşlər nəticədən asılı olmayaraq, özünü yaxşı tərəfdən göstərib sonadək vuruşan bir komandanı dəstəkləməlidirlər. Biz də çalışacağıq ki, 100 faiz yox, 200 faiz gücümüzü qoyub azarkeşlərin bizə olan inamını daha da artıraq”.