Sergey Zenyov: “Avroliqa mənim turnirimdir”

 “Qəbələ”nin estoniyalı futbolçusu Sergey Zenyov ölkəsinin mətbuatına müsahibə verib.

- Sergey, “Qəbələ”də son dövrlərdəki oyununu necə qiymətləndirirsən? “Bu mövsüm Avropa Liqasında 3 qol və 3 məhsuldar ötürmə ilə yadda qalmısan.

- Bunu yaxşı qiymətləndirmək olar. Ancaq bu barədə mənim danışmağım düzgün deyil. Nəticələrə baxmaq lazımdır. Mən həmişə komandamın yaxşı nəticə qazanması üçün çalışıram. Son vaxtlar isə nəticələrimiz ürəkaçandır.

- Ardıcıl ikinci ildir ki, Avropa Liqasında yaxşı çıxış edirsən.

- Yəqin Avropa Liqası mənim turnirimdir (gülür). Bəli, Azərbaycan çempionatı ilə müqayisədə Avropa Liqasında daha yaxşı oynayıram. Səbəbini bilmirəm.

- Avropa Liqasının qrup mərhələsində  “Anderlext”, “Maynz” və “Sent Etyen”Iə mübarizə aparacaqsınız. Bu rəqiblərdən ən çətini hansıdır?

- Düşünürəm ki, bu mövsüm bütün rəqiblərimiz səviyyəlidir. Əgər ötən mövsüm Dortmund “Borussiya”sı qrupumuzun favoriti sayılırdısa, indi rəqiblərin hər biri eyni dərəcədə güclüdür. Ancaq bütün rəqiblərlə oynaya bilərik. 

- Komandanız ardıcıl iki ildir ki, I təsnifat mərhələsindən qrup mərhələsinə qədər irəliləyir. Bu, çox çətindir.

- Əlbəttə. Ötən mövsüm yaxşı təcrübə qazandıq. Bu, tək “Qəbələ” üçün yox, bütövlükdə Azərbaycan futbolu üçün uğur deməkdir.

- Azərbaycan çempionatında nə baş verir? Bu mövsüm cəmi iki oyun keçirmisiniz. İndi isə çempionatda uzunmüddətli fasilə yaranıb.

- Orada qrafiki qurmaq çətindir (gülür). 8 komandalı çempionatdır. Sentybarın 10-da növbəti turun oyunları keçiriləcək. Avropa Liqasında mübarizə apardığımız üçün bizim oyunlarımızın qrafikində müəyyən dəyişikliklər olur.

- Millidə qol vurmağı öhdəliyinə götürürsən?

- Mən buna hazıram. Öhdəliyi götürmək istəyirəm.

Mənbə: qol.az