Teo Uiks: “100 faiz qrupda oynayacağıq”

“Qəbələ”nin bombardiri Teo Uiks “Lill” lə oyundan (1:1) sonra Futbolxeber.az saytının suallarını cavablandırıb.

- “Qəbələ” “Lill”i mübarizədən kənarlaşdırdı. Özünü necə hiss edirsən?

- Çox şadam. Qələbə qazandığımız üçün sevincimin həddi hüdudu yoxdur. “Lill” üzərində qələbə kiçik uğur. Vacib hesab oluna biləcək qələbə ilə qrup mərhələsinə bir qədər də yaxınlaşdıq.

- Hələ II mərhələdən sonra söhbətimizdə qeyd etmişdin ki, “Lill”i mübarizədən kənarlaşdıracağıq. Bu inam hardan idi?

- Çünki komandama güvənirdim. Biz səfərdə də pis oynamamışdıq. Cavab matçını da gözəl keçirdik. Təbii ki, “Lill”i mübarizədən kənarlaşdırmaq asan deyildi. Zamanla futbol dəyişir.

- Cavab matçının hansı hissəsi “Qəbələ” üçün daha çətin alındı?

- Oyunun özü ümumilikdə çox çətin alındı. Çünki ilk görüşlə müqayisədə rəqibin heyətində kifayət qədər dəyişiklik olmuşdu. Buna baxmayaraq, sona qədər vuruşub, qələbə qazandıq.

- İlk matçın ikinci yarısında “Qəbələ” inamlı görünmürdü. Amma Bakıda 90 dəqiqə boyunca döyüşkən “Qəbələ” gördük...

- İkinci oyunda evdə oynayırdıq. Öz azarkeşlərimiz çıxış edirdik. Onların dəstəyi ilə daha yaxşı mübarizə apardıq.

- “Lill” kimi klubu mübarizədən kənarlaşdırdıqdan sonra “Qəbələ”nin qrup mərhələsində çıxış edəcəyini əminliklə söyləmək olar?

- 100 faiz qrupda oynayacağq. Komandamıza güvənirəm. Heyətimizdə çox yaxşı futbolçularımız var. Şansımız böyükdür.

- Ukrayna mətbuatında “Şaxtyor”un səninlə maraqlandığı barədə xəbərlər yayılıb. Bu, nə dərəcədə həqiqətə uyğundur?

- Bu barədə mən də eşitmişəm. Şadam ki,”Şaxtyor” mənimlə maraqlanır. Lakin hazırda əsas məqsədim “Qəbələ”yə kömək etməkdi.

- Bəs, “Qəbələ” keçidinə maneçilik törətməsə..?

- Dediyim kimi, bu, məndən asılı olan məsələ deyil. Hazırda “Qəbələ”nin futbolçusuyam. Razılıq olsa, hər şey mümkündü

- Yəni, “Qəbələ”ni “Şaxtyor”a dəyişə bilərsən?

- Mümkündü. Çünki karyeramın parlaq alınmasını istəyirəm.