Teo Viks: “Lill”dən qorxmuruq”

“Qəbələ”nin aparıcı Teo Viks MTK ilə görüşdən sonra Futbolxeber.az saytına müsahibə verib.

- Bu dəfə MTK üzərində 2:0 hesablı qələbə qazandınız. Qarşılaşma barədə nə söyləyə bilərsən?

- Oyun bizim üçün asan keçmədi. Kənardan belə görünməyə bilər. Lakin səfərdə qələbə qazanmağımıza baxmayarq, bu matça da ciddi yanaşırdıq. Çünki rəqib 2, 3 qol vurmaqla mərhələ adlaya bilərdi.

- Əvvəlki oyunlarla müqayisə etsək, “Qəbələ”nin çıxışını budəfəki necə dəyərləndirmək olar?

- İlk mərhələdə “Samtredia” ilə qarşılaşmışdıq. Hesab edirəm ki, bu komanda MTK-dan daha güclü idi. Macarıstan təmsilçisinə qarşı oyunlarımız bir qədər asan alındı.

- “Samtredia”nı MTK-dan üstün hesab etməyinə səbəb nədir?

- Çünki “Samtredia” daha çox baxımlı oyun göstərməyə çalışırdı. Lakin MTK yalnız uzun toplardan yararlanırdı.

- Növbəti rəqib “Lill”dir. Fransa klubu ilə görüşlərdə şansları necə dəyərləndirərdin?

- Hamı bilir ki, bizi güclü rəqib gözləyir. İşimiz çətin olacaq. Lakin futbolda hər şey mümkündür. Uğur qazanmaq üçün meydanda mübarizə aparmaq lazımdır.

- Az əvvəl komanda yoldaşın Məhəmməd Mirzəbəyovla söhbətləşdim və o, qeyd etdi ki, “Lill”dən qorxmuruq. Onların Ederi varsa, bizim də Viksimiz var”...

- Bu sözlərə görə ona təşəkkür edirəm (gülür). Ederi Portuqaliyadan tanıyıram. Onunla dost deyilik. Lakin qarşı qarşıya gəlmişik. “Lill”dən qorxmuruq. Biz nəyə qadir olduğumuzu meydanda göstərəcəyik.

- Artıq 4 oyunda 5 qol vurmusan. Avroliqada bundan sonrakı hədəfin nədir?

- Növbəti oyunlarda da qol vurmağa çalışacağam. Məqsədim komandama kömək etməkdir. Avroliqanın qrup mərhələsində yarışmaq istəyirik. Bunun üçün də sona qədər mübarizə aparacağıq.