Oleq Bejenar: “Cavab matçında fərqli “Daçiya” görəcəksiniz”

“Gözlədiyimiz kimi, oyun çətin keçdi. Birinci hissədə komandam əsəbi idi. Amma fasilədən sonra üstünlüyü ələ aldıq. Düzdür, sonda uduza da bilərdik. “Kəpəz”in belə oynacağını gözləmirdik. Rəqib çox yaxşı təsir bağışladı”.

Futbolxeber.az saytının məlumatına görə, bu sözləri “Daçiya”nın baş məşqçisi Oleq Bejenar deyib.

Avroliqanın I təsnifat mərhələsinin ilk oyunu çərçivəsində “Daçiya” “Kəpəz”lə Bakıda qolsuz bərabərliyə razılaşıb.

Bejenar 90 dəqiqə ərzində futbolçulara özünün deyil, klub prezidentinin göstəriş verməsinə münasibət bildirmək istəməyib: “Bu haqda heç nə danışmaq istəmirəm. Klubun daxili məsələlərini bilmirsiz. Mən özümü narahat, ya da bunu hörmətsizlik kimi qəbul etsəydim, klubda qalmazdım”.

“Daçiya”nın çalışdırıcısı növbəti matçda tam fərqli komanda kimi çıxış edəcəklərini bildirib: “Komandamızda yeni oyunçular var. 20 gündür hazırlıqlara başlamışıq. Yeni futbolçular bir-birlərinə uyğunlaşmayıblar. Cavab matçında fərqli “Daçiya” görəcəksiniz”.