Vüqar Nadirov: “Milliyə dəvət almamağım mənim üçün də gözlənilməz oldu”

“Bu oyun bizim üçün mühüm əhəmiyyət kəsb edirdi. Sevinirəm ki, qələbə qazana bildik və avrokuboklara vəsiqə qazandıq”. Futbolxeber.az saytına açıqlamasında bu sözləri “İnter”in hücumçusu Vüqar Nadirov deyib.

Azərbaycan Premyer Liqasının sonuncu turunda “Zirə”ni 1:0 hesabı ilə məğlub edən “İnter” avrokuboklara vəsiqə qazanıb. Amma “bankirlər”in qitə kuboklarına qatılması üçün İdman Arbitraj Məhkəməsi müsbət cavab verməlidir.

Vüqar Nadirov qeyd edib ki, ehtimal az olsa da, avrokuboklardan ümidlərini tam üzməyiblər: “Rəhbərliklə bu haqda söhbətimiz olub. Hazırda cavabı gözləyirik. Ümidimizi üzməmişik”.

Nadirov “İnter”lə müqaviləsinin başa çatdığını bildirib: “İnter”lə artıq müqaviləm başa çatdı. Lakin gələcək karyeram haqda indidən nəsə deyə bilmərəm. Heç bir klubdan təklif almamışam”.

Sonda “İnter”in forvardı millinin Avstriya toplanışından kənarda qalması haqda danışıb: “Millinin qapısı hər bir futbolçunun üzünə açıqdır. Dəvət gözləyirdim. Çünki “İnter”ə gəldikdən sonr amütəmadi olaraq oyun praktikası qazandım. Əksər oyunlarda meydana çıxdım. Heyətdə yer almamağım mənim üçün də gözlənilməz oldu”.