"Bakı” rəsmisi ilə İspaniya millisinin baş məşqçisi arasında görüş oldu

“Bakı” klubunun nümayəndələri ölkəmizdə keçirilən 17 yaşadək futbolçular arasında Avropa çempionatında mübarizə aparan İspaniya milli komandasının düşərgəsini ziyarət ediblər. Futbolxeber.az saytının məlumatına görə, tərəflər arasında baş tutan görüşdə “Bakı”nı vitse-prezident Yaşar Seyidov, ispanları isə millinin baş məşqçisi Santi Denia təmsil edib.

İspaniyanın U-17 yığmasının çalışdırıcısı Santi Denia futbolçu kimi uzun illər Madrid “Atletiko”sunun formasını geyib. O, “Bakı”nın sabiq baş məşqçisi Milinko Pantiçlə komanda yoldaşı olub. Bu səbəbdən də Denia “Atletiko” və “Bakı” arasındakı əməkdaşlıqdan, “Land of fire Azerbaijan” brendindən məlumatlı olduğunu qeyd edib. İspaniya yığmasının çalışdırıcısı vurğulayıb ki, “Bakı” haqqında Pantiçdən kifayət qədər məlumat öyrənib. Denia onu da vurğulayıb ki, Pantiçlə çox yaxın dostdurlar.

Görüşün sonunda Yaşar Seyidov ispanlara “Bakı” klubunun atributlarını, formasını, eləcə də xatirə hədiyyələrini təqdim edib. İspaniya tərəfi isə “Bakı”ya ölkə yığmasının formasını hədiyyə verib.

Qeyd edək ki, “Bakı” klubu ölkəmizdə keçirilən 17 yaşadək futbolçular arasında çempionata ən çox diqqət ayıran klubdur.