“Şəmkir”də baş məşqçi dəyişikliyi

Mövsümün əvvəlində daha yüksək pillələrdə qərarlaşmağı hədəfləyən “Şəmkir”in bu məqsəddən uzaq düşməsi məşqçi dəyişikliyinə səbəb ola bilər. Futbolxeber.az saytının məlumatına görə, ikinci dövrədə ardıcıl xal ikisi ilə üzləşən və ilk “üçlük”dən kənarda qalan bölgə təmsilçisi Kamran Əlibabayevlə yollarını ayırmağa hazırlaşır.

Cəzalı olduğu halda XXV turda MOİK-lə matçda hakimləri təhqir edən və komandasını meydandan çıxararaq matçın 10 dəqiqə dayanmasına səbəb olan və nəticədə 12 ay futbol fəaliyətinə qadağa qoyulan Əlibabayevi əvəz edəcək çalışdırıcıdı da bəllidir. Əldə etdiyimiz məlumata görə ötən mövsüm komandada işləmiş, millimizin keçmiş üzvü Ruslan Abbasov yenidən “Şəmkir”in başında olacaq. 

Qeyd edək ki, “Turan”, “Neftçi”, “İnter” kimi komandalarda çıxış etmiş Abbasov Şəmkirdə çalışdığı müddətdə yerli azarkeşlərin sevimlisinə çevrilməyi bacarmışdı. Növbəti mövsümə daha iddialı komanda qurmağı hədəfləyən qərb təmsilçisinin yaxın günlərdə bu təyinatı açıqlayacağı gözlənilir.