“Neftçi” ümidini təkcə kuboka bağlamayıb”

“Bu gün qələbə bizə mütləq lazım idi. Çünki turnir cədvəlində AZAL-ı geridə qoymalıyıq”. Futbolxeber.az saytına müsahibəsində bu sözləri “Neftçi”nin yarımmüdafiəçisi Rəhman Hacıyev deyib.

Gənc futbolçu Premyer Liqanın 33-cü turunda AZAL-a 3:1 hesabı ilə qalib gəldikləri görüş haqda bunları söyləyib: “Neftçi” ümidini təkcə kuboka bağlamayıb. Çempionatda da uğurlu nəticə qazanmaq istəyirik. Hər oyuna qələbə qazanmaq üçün çıxırıq. Çünki “Neftçi” hazırda layiq olduğu yerdə deyil. Bu vəziyyətə birgə düşmüşük, yenidən yuxarı da birgə qalxmaqlıyıq”.

Rəhman Hacıyev “Neftçi”nin son oyunlarda uğurlu çıxış etməsinin səbəbini açıqlayıb: “Komandanın oyun sxemi dəyişdi. Bəlkə də bu məqam çıxışımıza təsir edir. Son 3 oyunda uğurlu çıxış edirik. Əlimizdən gələni edəcəyik ki, qarşıdakı görülərdə də uğur qazanaq”.

“Neftçi”nin aparıcı üzvü ölkə kubokunu qazanmaq istədiklərini vurğulayıb: “Təbii ki, “Qarabağ”a qalib gələcəyimizə inanırıq. Bunun üçün əlimizdən gələni edirik. Məqsəd kuboku qazanmaqdır”.