Asif Məmmədov: "Digər klublardan gələn təkliflərə çox ciddi yanaşmadım"

"İnter"in futbolçusu Asif Məmmədov Futbolxeber.az saytına müsahibə verib.

- Artıq bir neçə gündür ki, "İnter" təlim-məşq toplanışına başlayıb. Hazırlıq prosesinin gedişi barədə nə deyə bilərsən?

- Təlim-məşq toplanışımız yaxşı keçir. Hər şey qaydasındadır. Gündə 2 dəfə məşq edirik. Səhərlər fiziki məşqlər olur. Axşamlar isə topla çalışırıq.

- İstirahət etmək üçün vaxtınız elə də çox olmadı. Yorğunluq özünü biruzə verir?

- İstirahət üçün 2 həftə vaxt oldu. Bu elə də çox vaxt deyil. Amma çalışdım ki, səmərəli istifadə edim. Bir sözlə, yaxşı dincəldim. Hələ ki hər şey yaxşı gedir. Bir qədər yorğunluq var. Amma bu da olmalıdır. Çünki gündə 2 dəfə məşq edirik.

- Mövsüm başa çatdıqdan dərhal sonra bir neçə futbolçu "İnter"i tərk etdi. Bu məqam səni narahat etmir ki?

- Düzdür, bir neçə futbolçu komandadan ayrıldı. 2-3 futbolçunu çıxmaq şərti ilə qalanlarına ehtiyac yox idi və bu səbəbdən də getdilər. Bu haqda nə deyə bilərəm ki? Məşqçinin qərarıdı.

- Xeyli sayda futbolçunun gedişi komandanın çıxışına mənfi təsir göstərə bilər?

- Yəqin ki, komandaya gedənlərdən də yaxşı futbolçular gələcək. Komandamıza yeni futbolçular qoşulmalıdır. Amma hələ ki düşərgəmizə heç kim gəlməyib.

- Yəqin ki, sənin də xidmətində maraqlı olan komandalar var idi...

- Yerli və Türkiyə klublarından təklif var idi. Amma mənim komanda ilə 6 aylıq müqaviləm var. Ona görə də gələn təkliflərə çox ciddi yanaşmadım.

- Qarşıdan Avroliqa oyunları gəlir. Bu haqda nə düşünürsən?

- İnşallah çalışacağıq ki, bu turnirdə bacardığımız qədər irəli gedək. Avroliqada biz təkcə klubu deyil, bütün Azərbaycanı təmsil edirik. Buna görə də ölkəmizin adını ucaltmaq üçün əlimizdən gələni edəcəyik.

- Rəhbərlik Avroliqa ilə bağlı qarşınıza konkret tapşırıq qoyub, yoxsa hələ bu barədə söhbət olmayıb?

- Bizim məqsədimiz odur ki, ilk növbədə minimum 2 tur keçməliyik. Amma bu da son hədd deyil. Qalanı artıq püşkatmadan asılıdır. Çünki üçüncü mərhələdən etibarən daha güclü rəqiblərlə qarşılaşacağıq. Buna görə də üçüncü mərhələdəmn etibarən rəqibin kimliyi böyük önəm kəsb edəcək.

Elman MƏHƏRRƏMOV