Təbriz Həsənov: “Avropa çempionatı öncəsi futbolçuların motivasiyası yüksəkdir”

“Komandamızda vəziyyət çox yaxşıdır. Gündə 2 dəfə hazırlıqlarımızı davam etdiririk”. Futbolxeber.az saytına müsahibəsində bu sözləri 17 yaşadək futbolçulardan ibarət milli komandamızın baş məşqçisi Təbriz Həsənov deyib.

T. Həsənov qeyd edib ki, Avropa çempionatı öncəsi yığmamız 2 yoxlama oyununda qüvvəsini sınayıb: “Aprelin 18-dən məşqlərə start vermişik. 8 gün ərzində komandanın fiziki-funksional hazırlığının artırılması yolunda çalışdıq. Bu müddətdə 2 yoxlama oyunu keçirdik. U-19 millisinə 3:2 hesabı ilə qalib gəldiyimiz halda, “Qarabağ”ın əvəzediciləri ilə heç-heçə oynadıq - 2:2”.
Yığmamızın çalışdırıcısı zədəli futbolçuların son durumuna da toxunub: “Hüseyin Seyliqlinin zədəsi davam edir. Düzdür, artıq yüngül məşqlərə başlayıb. Lakin indidən onun durumu ilə bağlı dəqiq bir söz demək mümkün deyil. Kapitan Elçin Əsədovun da kiçik zədəsi var idi. Amma hazırda onun vəziyyəti yaxşıdır”.

Təbriz Həsənov Avropa çempionatı üçün yekun heyəti mayın 1-də açıqlayacağını qeyd edib: “Hazırda futbolçular özlərini yaxşı tərəfdən göstərirlər. Avropa çempionatı öncəsi futbolçuların motivasiyası yüksəkdir. Hər bir futbolçu heyətə düşmək üçün əzmlə çalışır. Bu da məni sevindirməyə bilməz. Mayın 1-də Avropa üçün yekun “18-liy”i açıqlayacağam”.