Millimiz Avropa çempionatının hazırlığına başlayır: “Tez gəlsəydilər, daha yaxşı olardı”

Bakıda keçiriləcək Avropa çempionatında çıxış edəcək 17 yaşadək futbolçulardan ibarət milli komandamız bu gündən etibarən qitə birinciliyinin hazırlıq prosesinin son mərhələsinə start verir. Futbolxeber.az saytına bu haqda yığmamızın baş məşqçisi Təbriz Həsənov məlumat verib: “Bu gündən etibarən hazırlığa başlayırıq. Hələlik hazırlıq prosesində Azərbaycanda çıxış edən futbolçular iştirak edəcək. 18 futbolçuya dəvət göndərmişik. Daha bir oyunçu isə Ukraynadan gəlib. Bu, Emin Səfixanovdur. Daha əvvəl o, komandamızın düşərgəsində olub. Hazırda hansı vəziyyətdə olduğunu canlı görmək üçün ona da dəvət göndərdik. Türkiyədə, Almaniyada çıxış edən yığma üzvləri isə düşərgəyə ayın 24-dək qoşulacaqlar. Təbii ki, onlar da tez gəlsəydilər, daha yaxşı olardı. Amma həmin futbolçular çempionatda çıxış edirlər. Yerli çempionatda oynayanları özüm tez bir yerə topladım. Çünki futbolçuların çıxışını izləyirik. Bəzi futbolçular son zamanlar formadan aşağı səviyyədə çıxış edirlər. Ona görə də hazırlığa erkən start veririk”.