Vaqif Cavadov: “Heç bir legioner yerli futbolçunu söyə bilməz”

“Oyunla bağlı heç nə deyə bilmərəm. Hər şey göz qabağında idi”. Futbolxeber.az saytına müsahibəsində bu sözləri “Sumqayıt”ın hücumçusu Vaqif Cavadov deyib.

Təcübəli futbolçu Premyer Liqanın XXX turunda AZAL-dan aldıqları 0:1 hesablı yenilgini belə şərh edib: “Bəxtimiz gətirmədi. AZAL-ı təbrik edirəm. Heç kimin haqqına girmək istəmirəm. Amma oyunu qoy, mütəxəssislər, jurnalistlər analiz etsinlər. Yaxaladığımız şansları dəyərləndirə bilmədik və uduzduq”.

Vaqif Cavadov matçın sonuna yaxın rəqib futbolçu Qvanzav Maqomedovlə aralarında baş verən insidentdən də danışıb: “Azərbaycana gələn heç bir legioner yerli futbolçunu söyə bilməz. Fərqi yoxdur, istər gürcü olsun, istər serb, istərsə də braziliyalı. Çünki biz onların evinə gedəndə heç vaxt söyüş söymürük. Eləcə də azərbaycanlı futbolçu əcnəbini təhqir edə bilməz. Mətbuat nümayəndələrindən də xahiş edirəm ki, bu cür məsələlərə diqqətlə yanaşsınlar. Mən Qvanzava öz iradımı bildirdim. Oyundan sonra da danışıb, barışdıq. Hər şey yaxşıdır”.