Tərlan Əhmədov: “Avroliqaya getmək AZAL üçün böyük uğur olar”

“3 xal üçün qazandığımız üçün sevinirik. Futbolçularıma təşəkkür edirəm”. Futbolxeber.az saytının məlumatına görə, bu sözləri “Sumqayıt”la oyundan sonra AZAL-ın baş məşqçisi Tərlan Əhmədov deyib.

Əhmədov 1:0 hesablı qələbəni belə şərh edib: Gərgin oyun alındı. “Sumqayıt” da yaxşı mübarizə apardı. Biz evdə hər oyunda maksimum nəticə qazanmağa çalışırıq. Çox vacib qələbə qazandıq. Ötən tur səfərdə xal itirmişdik. Ona görə də bu gün qələbə bizim üçün vacib idi. Əvvəlki mövsümlərdə AZAL 36-39 arası xal yığırdı. Ona görə də 40 xal həddini keçmək istəyirdik. Buna da nail olduq”.

AZAL-ın çalışdırıcısı Avroliqa şanslarını da dəyərləndirib: “Bu qələbə Avroliqa şansımızı artırdı. Mövsümə çox uğursuz başlamışdıq. Çempionatın əvvəlində ilk 5 oyunda qol vurmadan məğlub olmuşduq. Amma indi bu səviyyətə çatmışıq. Şans varsa, niyə də bundan istifadə etməyək? Avroliqaya getmək AZAL üçün böyük uğur olar. Kiçik büdcəylə Avroliqaya yollanmaq bizim üçün böyük nəticə olacaq” (CBC-Sport).