Böyükağa Hacıyev: “O sözü zarafatyana desəm də, çoxları fikrimi ciddi qəbul edib”

Bir neçə gün əvvəl "Xəzər TV”də yayımlanan "Futbol saatı” proqramında qonaq olan “Neftçi”nin sabiq baş məşqçisi Böyükağa Hacıyevin “Qəbələ”nin və milli komandamızın üzvü Pavel Paşayev haqda səsləndirdiyi fikirlər əks-səda doğurub. Futbolxeber.az saytı məsələnin aktuallığını nəzərə alaraq, Böyükağa Hacıyevə bu barədə sual ünvanlayıb. Təcrübəli mütəxəssis fikrinin düzgün anlaşılmadığını qeyd edib: “Həmin verilişdə mənə sual verildi ki, millimizin üzvü Pavel Paşayev kimdi? Mən də həmin futbolçunu yaxından tanımıram. Heç vaxt rəhbərliyim altında çıxış etməyib. Ona görə də zarafatca dedim ki, bəlkə “dayısı” var, ona görə çağırırlar…Bu sözü zarafatyana desəm də, çoxları fikrimi ciddi qəbul edib. Yenə deyirəm ki, mən Pavel Paşayevi tanımıram. Onun haqda dediyim sözlərin ciddi qəbul olunmasına qarşıyam. Mənim fikrim kiməsə sataşmaq, söz atmaq olmayıb. Paveli tanısaydım, deyərdim ki tanıyıram”.