“Neftçi” ilə oyuna “boevoy” vəziyyətdə çıxacağıq”

 “Neftçi” ilə oyuna tam hazırıq. Meydana “boevoy” vəziyyətdə çıxacağıq”. Futbolxeber.az saytının məlumatına görə, bu sözləri apasport.az-a açıqlamasında “Xəzər Lənkəran”ın baş məşqçisi Elbrus Məmmədov deyib.

“Ağ-yaşıllar” ölkə kubokunun 1/4 final mərhələsi çərçivəsində 2 gün sonra “Neftçi” ilə cavab görüşü keçirəcəklər.

İlk qarşılaşmada 3:2 hesablı qələbə qazanan lənkəranlılar indiki vəziyyətdə növbəti mərhələyə adlamağa daha yaxındılar.

Məmmədovun fikrincə, cavab görüşü daha çətin keçəcək. O, bunu “Neftçi”ni meydana yeni məşqçinin çıxaracağı ilə əlaqələndirib: “Matça çox ciddi hazırlaşırıq. Bizim üçün həyati əhəmiyyətli görüşdü. Müəyyən yorğunluq olsa da, böyük problemimiz yoxdu. Bizi çətin oyun gözlədiyini bilirik. Çünki “Neftçi” meydana yüksək motivasiya ilə çıxacaq. Məşqçi dəyişikliyi istər-istəməz müsbət təsir edir. Futbolçular özlərini yeni məşqçiyə göstərmək üçün əllərindən gələni edirlər. Amma heç bir bəhanəmiz ola bilməz. Yarımfinala çıxmağa borcluyuq”.

Cəzalı futbolçusu olmayan “Xəzər Lənkəran”da zədəli oyunçu da, demək olar ki, yoxdu. Yalnız İlyas Səfərzadənin yüngül zədəsi var. Lakin bu, gənc müdafiəçinin “Neftçi”yə qarşı oynamasına problem yaratmayacaq: “İlyas məşq zamanı ayağında ağrı hiss etdi. Həkimlər yoxladılar və məlum oldu ki, ciddi bir şey deyil”.

Qeyd edək ki, martın 9-da keçiriləcək “Neftçi” - “Xəzər Lənkəran” qarşılaşması saat 17:30-da start götürəcək.