Sami Hyuyupya: “Qəbələ” ilə oyundakı nəticə bizi narahat etmir”

“Mən bilirdim ki, “Qəbələ” ilə yoxlama görüşü bizim üçün çətin keçəcək. Çünki futbolçular həmin oyundan öncə çox yorulmuşdular”. Futbolxeber.az-ın apasport.az-a istinadən verdiyi məlumata görə, bu sözləri “Sürix” klubunun baş məşqçisi Sami Hyuyupya deyib.

Finlandiya yığmasının və “Liverpul”un sabiq müdafiəçisi İsveçrə mətbuatına danışıb. Geniş müsahibəsində “Sürix”in Antalya toplanışını dəyərləndirən Hyuyupya “Qəbələ”yə 0:4 hesablı məğlubiyyəti yada salıb.

42 yaşlı çalışdırıcı “Antalyadakı təlim-məşq toplanışında ağır məşqlər keçdik. Bununla yanaşı, yoxlama görüşlərində də qüvvəmizi sınadıq. “Qəbələ” və “Kayzerslautern”ə məğlubiyyətlərə gəlincə, “Qəbələ” ilə oyundan öncə səhər də məşq etmişdik. Qısası, matçın bizim üçün çətin keçəcəyini bilirdim. Bu mənada, “Qəbələ”, eləcə də “Kayzerslautern”lə yoxlama görüşlərindəki nəticələr bizi narahat etmir”.