“Xəzər Lənkəran” sabiq milli üzvü ilə anlaşdı, daha 2 futbolçu axtarışına çıxdı

“Xəzər Lənkəran” baxışda olan daha bir futbolçu ilə bağlı qərar verib. Futbolxeber.az-ın apasport.az-a istinadən verdiyi məlumata görə, 3 gün öncə “ağ-yaşıllar”ın düşərgəsinə qoşulmuş Asif Mirili baş məşqçi Elbrus Məmmədovun inamını qazana bilib.

Bunu Məmmədovun özü deyib. O bildirib ki, U-19 və U-21 yığmalarımızın sabiq üzvü ilə qısa zamanda sözləşmə imzalanacaq: “Mirili baxışda özünü doğrultdu və onu komandaya götürməyə qərar verdim. Ya bu gün, ya da sabah 1 illik müqaviləyə qol çəkəcək”.

 Asif Mirilidən öncə Tural Cəlilov, Nodar Məmmədov, Ruslan Cəfərov, Orxan Səfiyaroğlu və Vaquf Güləliyevlə güclənən “Xəzər Lənkəran” bununla kifayətlənmək fikrində deyil. Cənub təmsilçisi “transfer pəncərəsi” bağlanana qədər heyətinə daha bir neçə oyunçu qatmaq niyyətindədi.

Məmmədov indiki məqamda komandanın daha çox iki mövqeyində problem olduğunu vurğulayıb: “Futbolçu axtarışındayıq. Xüsusilə 2 mövqeyə yeni oyunçu lazımdı. Hücumçu və dayaq yarımmüdafiəçisi tapmalıyıq. Dayaq yarımmüdafiəsinə təcrübəli futbolçu istəyirəm. Amma başa düşürəm ki, indiki məqamda bunu reallaşdırmaq şansımız 5 faizdi”.

Qeyd edək ki, “Xəzər Lənkəran” qış fasiləsindən sonra çempionatda ilk oyununu bazar günü “Rəvan”a qarşı keçirəcək.