Ramin Musayev: “250 min verdiyimiz oyunçuya 1 milyon təklif etsələr də, getmədi”

Peşəkar Futbol Liqasının prezidenti Ramin Musayevin Futbolxeber.az saytına müsahibəsi

- Bu gün Premyer Liqa klublarından “Xəzər Lənkəran” və “Rəvan” maliyyə problemlər yaşayır. Premyer Liqanı təşkil edən qurumun rəhbəri kimi bu məqam sizi nə dərəcədə narahat edir?

- Ən böyük problem “İnter”də olub. Keçən il mart ayından bu klubda ciddi problemlər başladı. Amma komanda Avroliqada üçüncü mərhələyə qədər irəlilədi. Ovaxtkı rəhbərliyin, məşqçilərin, oyunçuların sayəsində “İnter” çıxışına görə heç bir komandadan geri qalmadı. Klubda hər şey rəhbərlikdən aslıdı. Mən “Neftçi”də çalışanda oyunçularımıza bizdən 3 dəfə artıq pul təklif edən var idi. Hətta 1 milyon da ödəməyə razı idilər. Özü də söhbət təkcə yerli oyunçudan getmir. Legioner futbolçumuz digər klubdan sərfəli təklif alsa da, getmədi. Legioner üçün nə fərqi var Bakıda oynadı, ya Şəkidə. Evindən çıxıb, pul qazanmağa gəlib. Lakin azad agent olsa da, “Neftçi”dən getmədi. Bir neçə ildən sonra həmin klub rəhbəri, Rövnəq Abdullayev və mən birlikdə idik. Həmin rəhbər şəxs soruşdu ki, necə olur sizin 250 min verdiyiniz futbolçuya 1 milyon təklif etsəm də, razılaşmadı?

- Həmin oyunçu...

- Rəşad Sadıqov idi, 14 nömrə. Bunu dana bilmərəm. Legioner də Georgi Adamiya.

- Bəs Zaur Tağızadə?

- O cümlədən də Zaur Tağızadə. Mən bu futbolçuların adlarını çəkməliyəm. Fantastik məbləğ təklif olunsa da, “Neftçi”dən getmədilər. Zaur, Rəşadı başa düşdük. Azərbaycanlıyıq, eyni şəhərdə yaşayırıq, sabah yenə üz-üzə gələcəyik. Bəs Adamiya, o niyə getmədi? Çünki komandaya rəhbərlik edən şəxsdən çox şey aslıdı. 5 il “Neftçi”də çalışdıq. Hansısa şikayət edən oldu? Olmayıb. Çünki düz işləyirdik. Müqaviləni futbolçularla mən bağlayırdım. Yığırdım hamısını bir yerə. Kimin nə qədər alacağını da açıq şəkildə orda deyirdim. Tək-tək çağırıb deməyin nə mənası var? Onsuz da qapıdan çıxan kimi hamı bilir. Nəyə görə vaxt itirməliyəm? Qayıdaq suala. Necə olur “İnter” in futbolçuları martdan yaya kimi oynadılar, avrokbuoklarda çıxış etdilər, amma bu gün başqaları oynamır. Onlar da oynasınlar da. Klub rəhbərinin vəziyyəti pis ola bilər, bəs vicdan? Bəlkə 1 aydan sonra prezidentin elə imkanı olacaq ki, sənə 2 qat artıq pul verəcək.

- “Xəzər Lənkəran” və “Rəvan”dakı problemlər Premyer Liqaya təsir edəcək?

- Çempionata təsir edəcəyinə inanmıram. Olsa da, hər bir çətinlikdən çıxış yolu var.

- Bu klubların bank təminatı aktivləşdirilə bilər?

- O dərəcəyə gedib çıxacağına inanmıram. Ad çəkib həmin klubların rəhbərləri haqda tərif söyləməyə ehtiyac görmürəm.

- Ramin müəllim, hakimlərin Antalyadakı təlim-məşq toplanışı niyə baş tutmadı?

- Birincisi, bu il Antalyaya klublarımız az getdi. Biz hakimləri Antalyaya gəzməyə aparmırıq. Səhər 7-dən axşam 10-a qədər iş başında olurlar. Əgər orda oyun olmayacaqsa, yalandan nəyə gedək? “Dalğa Arena”da hazırlıq keçirlər. Özüm də o gün getmişdim ora. Şərait Antalyadakından heç də geri qalmır. Artıqdı ki, əksik deyil. Havası gözəl, yeməkləri yaxşı. Bircə problem süni ot örtüyüdür ki, Antalyada təbii otda məşq edəcəkdilər. Belə baxanda onsuz da bizdə meydançaların yarısının qazonu sünidi. Çox şükürlər olsun ki, Antalyaya getmədik.

- Nə mənada?

- Türkiyədə “Donuz qripi” yayılıb. Kimsə xəstələnə bilərdi. Şükür ki, getmədik. Hakimlərin hazırlıqlarından razıyıq.

- Yəni, demək istəyirsiz ki Antalya toplanışının baş tutmamasının maliyyə ilə heç bir əlaqəsi yoxdu?

- Yox. Allaha şükür AFFA-nın da pulu var, PFL-ın də. Xeyri yoxdusa, Antalyaya nəyə gedək? Orda da dəniz qırağında qaçacaqdılar, burda da qaçırlar. Orda da 3-5 oyun idarə edəcəkdilər, burda da həmin oyunları idarə edirlər. Daim Antalyaya səfərimizi təşkil edən şirkət dedi ki, mən əvvəlki illərdəki kimi oyun sayı söz vermirəm. 20 oyuna cəmi söz verdi. Həmin 20 oyunu burda da idarə edirlər.

- 2-3 klubdan başqa, qalanları hələ də PFL-ə olan borcunu ödəməyib. Ödəməsələr, necə olacaq?

- Sözümüz sözdü.

- Maddi problemlər “Topaz”ın sponsorluq öhdəliklərini tam olaraq yerinə yetirməsinə mane olmur ki?

- Yox, heç bir problem yoxdur. “Topaz”la çox mehribanıq, işbirliyimiz də davam edir. İnanmıram ki, gələcəkdə də hansısa narazılıq olsun. “Topaz”ın gəlişi bizə düşərli oldu. Onları əldən buraxmarıq.