“Qəbələ”nin Antalyadakı sonuncu oyununun başlama vaxtı açıqlandı

Mövsümün ikinci yarısına Türkiyədə hazırlaşan “Qəbələ” sabah son yoxlama oyununu keçirəcək. Futbolxeber.az-ın məlumatına görə, yanvarın 10-dan Antalyada təlim-məşq toplanışında olan “qırmızı-qaralar” 3-cü sınağında Ukraynanın “Dnepr” klubu ilə görüşəcək. Qonşu ölkədə Almaniyanın “Osnabryuk” (1:1) və İsveçrənin “Sürix” (4:0) klubları ilə qarşılaşan Roman Qriqorçukun yetirmələri yanvarın 24-də baş tutacaq son matçı ilə hazırlıqları tamamlayacaq. Ayın 25-də vətənə dönəcək komanda “Dnepr”lə qarşılaşması Bakı vaxtı ilə saat 19:00-da başlayacaq. Görüş “Gloria Sport Arena”da keçiriləcək.

Ukraynanın 3 ən titullu klubundan biri olan “Dnepr” Miron Markeviçin baş məşqçiliyi altında qış fasiləsinə 4-cü pillədə yollanıb. Ötən mövsüm ölkə çempionatında 3-cü olan Dnepropetrovsk klubu UEFA Avropa Liqasının finalınadək irəliləyib. Əsası 1918-ci ildə qoyulan komanda SSRİ dövründə 2 çempionluq, 1 kubok, 1 Superkubok sevinci yaşayıb. Bundan başqa, çempionatda 2 gümüş və 2 bürünc qazanan “Dnepr” 2 dəfə Federasiya kubokuna sahib çıxıb (klub saytı).