Yaşar Vahabzadə qələbəni şərh etdi: “Oyunumuz məni qane etdi”

21 yaşadək futbolçulardan ibarət milli komandamızın baş məşqçisi Yaşar Vahabzadənin Futbolxeber.az saytına müsahibəsi   

- U-21 millimiz “Antalya Cup”dakı ilk oyununda Ukraynaya 2:1 hesabı ilə qalib gəldi. Komandadan razı qaldınız?

- Uşaqlardan razı qaldım. Çoxları klubunda yüklənmişdi. Bu, açıq-aydın görünürdü. Bəzi oyunçularda yorğunluq da vardı. Ümumi götürəndə, komandanın oyunu məni razı saldı. Futbolçular meydanda əllərindən gələni etdilər.

- Komandada ilk oyunun gərginliyi hiss olunurdu?

- Əlbəttə. Amma Ukrayna da pis komanda deyil. Cəld, çevik, topla yaxşı davranırdılar. Bizim üçün də yaxşı oyun oldu. Oyunumuz məni qane etdi

- Matçı hissələrə ayırsaq...

- Məncə ilk yarı ilə müqayisədə, ikinci hissədə daha yaxşı sərgilədik.

- Yəqin bunda fasilədə verdiyiniz tapşırıqların rolu olub.

- Yox, belə deməzdim. Onsuz da fasilədə öz tapşırıqlarımızı verəcəkdik.

- Bəs, onda ikinci hissədəki inamlı oyunun səbəbi nədir?

- Matçın əvvəlində komandada həyəcan var idi. Bu, bizim turnirdəki ilk oyunumuz idi. Üstəlik, komanda çoxdandı biryerdə olmurdu. Həmçinin heyətdə yeni oyunçular da vardı – Kamal Mirzəyev, Ruslan Nəsirli. Onlar da özlərini yaxşı tərəfdən göstərdilər. Digər tərəfgdən də uyğunlaşmağa vaxtımız olmamışdı.