"AFFA-dan kim pul söz veribsə, "Rəvan" adını çəksin"

AFFA cari mövsüm Azərbaycan I divizionundan Premyer Liqaya yüksələn "Rəvan" klubuna çempionata qatıldığı üçün pul vəd olunması və həmin məbləğin ödənilməməsi ilə bağlı yayılan məlumatlara aydınlıq gətirib. Futbolxeber.az-ın məlumatına görə, assosiasiyanın İnformasiya və İctimaiyyətlə Əlaqələr Departamentinin rəhbəri Mikayıl Nərimanoğlu Sportnet.az-a açıqlamasında məsələyə münasibət bildirib.

Onun sözlərinə görə, təmsil etdiyi qurum heç bir kluba hansısa məbləğ vəd etməyib. M.Nərimanoğlu bildirib ki, federasiyadan kimlərsə, hansısa vəd veribsə, klub bunu açıqlamalıdır: "Konkret kim deyib ki, AFFA pul ödəyəcək? Ad çəksinlər, desinlər ki, filankəs bizə bu sözü verib. Mən qapı-qapı düşüb soruşmayacam ki, "sən "Rəvan"a pul söz vermisən, ya yox? Heç bir pul vəd olunmayıb".

Qeyd edək ki, "Rəvan" klubu Premyer Liqaya qatılmaları müqabilində AFFA-nın maliyyə dəstəyi verəcəyinə dair vəd verdiyini iddia edir.