Təbriz Həsənov: “Müdafiə olunmaq barədə düşünmürdük”

“Rəqibi qələbə münasibəti ilə təbrik edirəm. Pis oynamadıq. Sonda yorğunluq sözünü dedi. Hesabda öndə olanda da müdafiə olunmaq barədə düşünmürdük. Rəqib sonda təzyiqi artıraraq, qollar vurdu”. Futbolxeber.az-ın Sankt-Peterburqa ezam olunmuş əməkdaşının verdiyi məlumata görə, bu sözləri 17 yaşadək futbolçulardan ibarət milli komandamızın baş məşqçisi Təbriz Həsənov Valentin Qranatkinin xatirəsinə həsr olunmuş beynəlxalq turnirdə 7-ci yer uğrunda Belarusa qarşı keçirdikləri oyundan (1:2) sonra deyib.

Həsənov komandasının turnirdəki çıxışını normal sayıb: “Daha əvvəl də demişdim ki, biz turnirə Avropa çempionatına hazırlıq gözü ilə baxırdıq. AFFA rəhbərliyi də komandanın uğurlu çıxışı üçün əlindən gələni edir. Ümumi götürəndə 7-ci və ya 8-ci olmaq arasında ciddi fərq yoxdu. Buraxdığımız ikinci qola görə qapıçını günahlandırmaq istəməzdim. Futbol səhvlər oyunudu”.