Tale Heydərov: "Həmin amilə görə Syominə üstünlük verdik"

“Yuri Syominlə müqaviləni "1+1" il prinsipiylə bağlamağımız hər iki tərəfin istəyinin nəticəsindir". Futbolxeber.az-ın məlumatına görə, bu sözləri jurnalistlərə açıqlamasında "Qəbələ" klubunun prezidenti Tale Heydərov deyib.

Tale Heydərov ikinci dəfə keçirilən Qəbələ kubokunun ilk oyun günü jurnalistlərlə görüşündə Yuri Syominin təyinatı ilə bağlı fikirlərini açıqlayıb: “Syomini seçməyimiz onun MDB məkanından olması ilə bağlıdır. Regionu yaxşı tanıyır, futbolçuların qabiliyyətinə bələddir. Bizim Braziliya və Hollandiyadan da namizədlərimiz var idi. Lakin həmin amilə görə Syominə üstünlük verdik”.

Heydərov Qəbələdə təşkil olunan 15 yaşadək futbolçular arasında turnirin əhəmiyyəti haqda da danışıb: “Qəbələ” klubunun belə bir infrastrukturu, stadionu, meydançaları, şəraiti varsa, niyə də belə turnirlər təşkil etməyək? Belə beynəlxalq matçlarda güclü komandalarla görüşən futbolçularımız da oyun təcrübəsini artırmış olur”.