Cavid Hüseynovla bağlı məhkəməyə müraciət ediləcək

Artıq 2 aydır həbsdə olan “Qəbələ”nin kapitanı Cavid Hüseynovun barəsində seçilmiş həbs-qətimkan tədbirinin ev dustaqlığı ilə əvəz olunması üçün yenidən məhkəməyə müraciət ediləcək. Futbolxeber.az-ın məlumatına görə, bu haqda musavat.com-a futbolçunun vəkili Adəm Məmmədov açıqlama verib. Vəkil müraciətin bir neçə gün ərzində məhkəməyə təqdim ediləcəyini qeyd edib.

Cavid Hüseynovla görüşdüyünü deyən vəkil, futbolçunun saxlanma şəraitindən narazı olmadığını və özünü günahsız hesab etdiyini bildirib.

Vəkil istintaqın gedişi ilə bağlı yeniliyin olmadığını qeyd edərək, əvvəlki açıqlamalarında olduğu kimi, hüquqlarını müdafiə etdiyi şəxsin günahsız olduğunu söyləyib: “Həmişə qeyd etmişəm ki, hüquqlarını müdafiə etdiyim şəxsin heç bir günahı yoxdur. Əgər günahı olsaydı, bunu israrla deməzdim. Hər kəs Cavid Hüseynovun günahsız olduğunu bilir. Həbs edərkən sübutlara istinad olunur. Səs yazıları, verilən ifadələr sübut edir ki, Cavid Hüseynovun hadisədən xəbəri olmayıb”.

Xatırladaq ki, futbolçu barəsində seçilmiş həbs-qətimkan tədbirinin ev dustaqlığı ilə əvəz olunması üçün avqust ayında Səbail rayon Məhkəməsinə vəsatətlə müraciət edilib. Lakin vəsatət təmin edilməyib.