Sergey Zenyov: “Borussiya”nı məğlub edə biləcəyimizə inanırıq”

“Qəbələ”nin hücumçusu Sergey Zenyov Futbolxeber.az saytına müsahibə verib.

- Premyer Liqanın son turunda “Neftçi” üzərində minimal hesablı qələbə qazandınız. Görüşlə bağlı nə deyə bilərsən?

- Ağır oyun oldu. Rəqibin ciddi müqaviməti ilə üzləşdik. Yalnız sonda istəyimizə çatıb, qol vurduq. Əsas odur ki, qalib gəldik. Bu 3 xal bizim üçün çox vacibdir.

- “Qəbələ” sanki hücumda istədiyi kimi oynaya bilmirdi...

- Sona qədər nübarizə apardıq. Oyunu analiz edəcəyik, səhvlərimizi, çatışmayan cəhətlərimizi müəyyənləşdirəcəyik.

- Hakimlik barədə fikirlərin necədir?

- Hakimliyi müzakirə etməyəcəyəm.

- Bir epizodda hakimə aqressiv şəkildə etiraz edib, sarı vərəqə ilə cəzalandın. Bu səbəbdən hakimlik barədə sual verdim.

- Oyunda belə hallar olur. Bir anlıq əsəbləşdim.

- “Neftçi” üzərində qələbə “Borussiya” ilə oyunöncəsi komandanın motivasiyasına müsbət təsir göstərəcək?

- Qələbə hər zaman xoşdur. Qarşıda bizi çətin oyun gözləyir. Həmin görüşdən öncə 3 xal qazanmağımız vacib idi.

- “Borussiya” haqda fikirlərin necədir?

- “Borussiya”nı hələ analiz etməmışık. Məşqçilərimiz bizə lazımı məlumatları verəcəklər. Amma ümui götürdükdə rəqibin gücü təkcə bizə yox, hamıya məlumdur. Dortmund klubu olduqca güclü heyətə malikdir.

- Dortmund klubu ilə oyun üçün şansları necə dəyərləndirərdin?

- Şanslar 50-nın 50-yədir. Oyundan əvvəl şanslar həmişə bərabər olur (gülür).  

- Komanda “Borussiya”nı məğlub edə biləcəyinə inanır?

- Hər zaman demişəm, inam yoxdusa, meydana çıxmağa dəyməz. Özünə güvənməsən, oynamağın mənası yoxdur. Biz də özümüzə güvənirik. Uğurlu nəticə qazanacağımıza inanırıq.