“Çalışmalıyıq ki, Mxitaryan Bakıda qol vurmasın”

“Qəbələ”nin yarımmüdafiəçisi Samir Zərgərov Premyer Liqanın VIII tur çərçivəsində “Neftçi”ni 1:0 hesabı ilə məğlub etdikləri oyundan sonra Futbolxeber.az saytına müsahibə verib.

- “Neftçi” üzərində qələbəni necə şərh edə bilərsən?

- “Neftçi” yaxşı komandadır. Bizə qarşı da yaxşı oynadılar. Komandanın heyətinin əsasını gənclər təşkil edir. Meydanda çox çox qaçırdılar. Lakin yekunda qələbə qazandıq. Düzdür, qolu gec vurduq. Amma imkanlarımız çox idi.

- Meydança sürüşkən idi? Çünki ilk hissədə futbolçular tez-tez sürüşürdülər...

- Hə, meydança sürüşkən idi. Yəqin ki, bu da yağışla əlaqədardı. Qazon çox yumşaq   idi. Ayaqüstə dayanmaq olmurdu.

- “Neftçi”nin sol cinah müdafiəçisi Ailtona qarşı mübarizə aparmaq  çətin idi?

- Dediyim kimi “Neftçi” zəif rəqib deyil. Ailton da yaxşı futbolçudur. Hər bir rəqibə hörmət etmək lazımdır.

- Rəqibin sizə qarşı sona qədər mübarizə aparacağını gözləyirdiniz?

- Gözləyirdik. Hətta oyundan öncə öz aramızda da danışanda bunu deyirdik. Bilirdik ki, “Neftçi” bizə qarşı sona qədər vuruşacaq.

- Matçın keçirildiyi Ismət Qayıbov adına stadionda oyunöncəsi məşq etməmişdiniz. Bu məqam çıxışınıza təsir göstərdi?

- Yox, hər hansı bir çətinlik olmadı. Əksinə, belə daha rahat idi. Sadəcə meydança oyunumuza təsir göstərdi. Belə meydanda sürətli futbol oynamaq olmaz.

- Artıq növbəti oyun “Borussiya”ya qarşıdır. Dortmund klubu ilə oyundan nə gözləyirsiz?

- “Borussiya” elə-belə komanda deyil. Rəqibin gücü hamıya məlumdu. Bununla belə, meydana uğur qazanmaq üçün çıxacağıq. Qrup mərhələsinə düşməyimiz təsadüfi deyil. Evdə oynayırıq və əlimizdən gələni edəcəyik.

- “Borussiya”nın heyətində erməni futbolçu Henrik Mxitaryanın meydana çıxması motivasiyanızı artıacaq?

- Çalışmalıyıq ki, Mxitaryan Bakıda qol vurmasın. Heç qol ötürməsi verməsinə, özünü yaxşı tərəfdən göstərməsinə imkan vermək olmaz.