“Neftçi”nin hücumçusu: “Bizi fitə basan azarkeşlər haqlıdırlar”

“Bu gün “Neftçi” sona qədər mübarizə apardı. 3 xal qazanmaq istəyirdik. Şanslarımız da oldu. Amma sonda bəxtimiz gətirmədi”. Futbolxeber.az saytına müsahibəsində bu sözləri “Neftçi”nin hücumçusu Anyete deyib.

“Ağ-qaralar”ın ispan forvardı “Qəbələ”yə 0:1 hesabı ilə uduzduqları oyunu belə şərh edib: “Məğlubiyyətin nədən qaynaqlandığını bilmərəm. Amma 2-3 oyunda bəxtimiz gətirməyib. Çalışırıq ki, qol vuraq və qalib gələk. Lakin alınmır”.

Anyete meydana start heyətində çıxmaması haqda sualı belə cavablandırıb: “Heyətlə bağlı qərarı baş məşqçi verir. Əvəzetmədən oyuna qoşulmağıma da o qərar verdi. Mən oyuna hazır idim. Yüngül zədəm olsa da, bu, oynamağıma mane olmadı”.

“Neftçi”nin hücumçusu oyundan sonra onları fitə basan azarkeşlərin narazılığının haqlı olduğunu qeyd edib: “Tamamilə haqlıdırlar. Çünki “Neftçi” hazırkı pillədə qərarlaşamağa layiq komanda deyil. Qələbə qazanmalıyıq”.