“Xəzər Lənkəran” AZAL-la oyunun hazırlıqlarına start verib

Premyer Liqanın son turunda “Qəbələ”yə böyükhesabla məğlub olan “Xəzər Lənkəran” məşqləri bərpa edib. Bu haqda Futbolxeber.az saytına Lənkəran klubunun mətbuat xidmətinin rəhbəri Hüseyn Cəbrayıloğlu məlumat verib. Klub rəsmisi qeyd edib ki, 5 günlük istirahətin ardından komanda üzvləri srağagün məşqləri bərpa ediblər. Dünən komanda daha 2 məşqə çıxıb. Bu günə də komandanın 2 məşqi planlaşdırılıb ki, artıq səhər çalışması baş tutub. Məşqlərdə millinin düşərgəsində olanlarla yanaşı zədəli Orxan Əliyev iştirak etmir. Rasim Ramaldanov isə fərdi məşqlərlə kifayətlənir.

Xatırladaq ki, “Xəzər Lənkəran” Premyer Liqanın növbəti turu çərçivəsində AZAL-ı sınağa çəkəcək. Lənkəran şəhər stadionunda baş tutacaq qarşılaşma oktyabrın 18-də keçiriləcək.