UEFA “Qəbələ”nin “Borussiya” və “Krasnodar”la ev oyunlarının başlama saatını açıqladı

Avroliqanın qrup mərhələsi çərçivəsində “Qəbələ”nin keçiriləcəyi bütün oyunların başlama saatı açıqlanıb. Futbolxeber.az-ın məlumatına görə, qitə futbol qurumu buna kimi təmsilçimizim yalnız ilk 2 turun oyunlarının vaxtını bəyan etmişdi. Artıq 3, 4, 5 və 6-cı turun görüşlərinin də başlama vaxtı bəllidir.

III tur çərçivəsində “Bakcell Arena”da baş tutacaq “Qəbələ” - “Borussiya” (22 oktyabr) oyunu 20:00-da start götürəcək. IV turda (5 noyabr) təmsilçimiz Dortmunda meydana çıxacaq və həmin matç Bakı vaxtı ilə 22:00-da başlanacaq. V turda “Qəbələ” səfərdə PAOK-la üz-üzə gələcək. 26 noyabrda oynanılacaq qarşılaşmanın start fiti 00:05-də veriləcək. Son turda isə “Qəbələ” “Bakcell Arena”da “Krasnodar”la üz-üzə gələcək. Dekabrın 10-una təsadüf edəcək görüş 22:00-da başlanacaq.