“Qəbələ”dən rəsmi açıqlama: "... Cavid son 2 oyunda komandaya kömək edə bilər"

Xəbər verdiyimiz kimi, “Qəbələ”nin Avroliqanın qrup mərhələsində iştirak üçün UEFA-ya göndərdiyi siyahıda Cavid Hüseynovun da adı var. “Qəbələ”nin Marketinq üzrə meneceri Səməd Nəsibov Futbolxeber.az saytına açıqlamasında Cavidin adını UEFA-ya göndərmələrinin səbəbini belə izah edib:

“Hazırda Cavid haqda həbs-qətimkan qərarı qəbul olunub. Onun günahkar olması dəqiqləşməyib. 3 aylıq istintaq başa çatdıqdan sonra hər şeyə aydınlıq gələcək. Həmin 3 aylıq müddət isə təxminən noyabrın 10-da başa çatır. Biz Cavidin günahkar olmadığına inanırıq. Əgər, məhkəmə Cavidin günahsız olduğunu açıqlasa, o zaman Hüseynov yenidən komandaya kömək edə bilər. Avroliqada qrup mərhələsinin oyunları dekabrda başa çatır. Yəni, azadlığa çıxacağı təqdirdə Cavid ən azı 2 oyunda “Qəbələ”yə kömək edə bilər. Qaydalara görə, qrup mərhələsinin gedişində UEFA-ya yeni futbolçunun adını sifariş etmək qeyri-mümkündür. Biz də bütün bunları nəzərə alaraq, Cavidin adını əvvəldən UEFA-ya göndərdik”.