Kanales, Müller, Cilardinyo və Yovetiçlə bir sırada

Avropa ölkələrinin milli çempionatlarında ən çox qol vuran futbolçuya təqdim olunan “Qızıl buts” mükafatına iddiçıların siyahısı açıqlanıb. Futbolxeber.az-n məlumatına görə, 79 futbolçunun adının düşdüyü siyahıda "Neftçi"nin hücumçusu Nikolas Kanales də var. 26 qolla Premyer Liqanın ən yaxşı bombardiri olan Nikolas Kanales 67-ci yerdədir. Çempionatımızın əmsalı 1-ə bərabər olduğundan çililinin xalı da 26-dır. O, məşhur simalardan Tomas Müller (“Bavariya”), Alberto Cilardinyo (“Bolonya”) və Stefan Yovetiç (“Fiorentina”) kimi oyunçulara şərikdir. Lakin bu ulduzların oynadığı çempionatların əmsalı 2-yə bərabər olduğundan, onlar 26 xalı 13 qolla qazanıb.

 

Siyahıya “Barselona”nın İspaniya çempionatındakı oyunlarında 45 qol vuran Lionel Messi başçılıq edir. 90 xalı olan argentinalı ən yaxın izləyicisini 22 xal qabaqlayır.