“Gəncləşdirmə siyasəti” aparan “Neftçi”nin yetirmələri “Rəvan”a üz tutur?!

Peşəkar Futbol Liqasının İnformasiya və İctimaiyyətlə Əlaqələr Departamentinin rəhbəri Aslan Şahgəldiyev Futbolxeber.az saytına açıqlamasında məsələyə belə münasibət bildirib: “Əsasnamədə forma ilə bağlı konkret heç nə göstərilməyib. Yalnız o qeyd olunub ki, meydan sahibi klub 8 topdaşıyanı oyuna gətirməlidir. Onların geyindikləri forma da meydandakı komandaların formasından seçilməlidir. Razıyam, əksər hallarda topdaşıyanlar meydan sahiblərinin formasında olurlar. Amma “Rəvan”ın topdaşıyanlarının niyə məhz “Neftçi”nin formasında olmasının səbəbini bilmirəm. Bununla bağlı əsasnamədə konkret heç nə göstərilmədiyi üçün “Rəvan” hansısa qayda pozuntusuna yol verməyib”.

Şahgəldiyevin də dediyi kimi, burada hər hansı bir qayda pozuntusu yoxdur. Amma topdaşıyanların meydan sahibinin deyil, başqa klubun formasını geyməsi hər halda maraq doğrurur. Belə ehtimal etmək olar ki, ya “Rəvan”ın uşaq futbolunda ciddi problem var. Komanda topdaşımaq üçün 8 yetirməsini tapa bilmir. Ya da son vaxtlar gəncləşdirmə siyasəti aparan, amma 33 yaşlı legioner futbolçu transfer edən “Neftçi”nin yetirmələri özlərini başqa yerdə sınamaq qərarına gəliblər.