"Məni heyətində ölkənin digər aparıcı klubları israrla görmək istəyirdi"

"Neftçi" ilə yeni müqavilə imzalayan Rəşad Sadiqov fikirlərini klubun rəsmi saytı ilə bölüşüb. Futbolxeber.az-ın məlumatına görə, təcrübəli futbolçu ölkə kubokunu qazanacaqlarına inandığını bildirib: "Premyer Liqada diqqətimizi yalnız çempionluğa yönəltmişdik və nəticədə bunu bacardıq. İnanıram ki, ölkə kubokunu da qazanacağıq. “Neftçi” ilə yeni müqavilə bağlamağım mənə əlavə stimul verir. Məni heyətində ölkənin digər aparıcı klubları israrla görmək istəyirdi. Bir futbolçu kimi mənim üçün maddi məsələlərdən daha önəmli məqamlar var. “Neftçi”dəki abu-hava, bizə göstərilən qayğı və burada qazandığım uğurlar fikrimcə, daha vacibdir. Azərbaycanın ən köklü və titullu klubunda çıxış etmək qürurvericidir. Klub rəhbərliyinin göstərdiyi etimadın müqabilində əlimizdən gələnin ən yaxşısını etməliyik. Azarkeşlərimizin də dəstəyi ilə avrokuboklardakı uğurumuzun davamını gətirəcəyimizə ümid edirəm”.