“Xəzər Lənkəran” xorvat və serb futbolçulardan imtina etdi

“Xəzər Lənkəran” bir müddətdir yolunu gözlədiyi xorvat və serb futbolçulardan imtina edib. Bu haqda Futbolxeber.az saytına “Xəzər Lənkəran”ın mətbuat xidmətinin rəhbəri Hüseyn Cəbrayıloğlu məlumat verib. Klub rəsmisi qeyd edib ki, hücumçu və pleymeyker mövqeyində çıxış edən futbolçular baxışa gəlməkdən imtina ediblər: “Həmin futbolçular komandamızın düşərgəsinə baxışa gəlməliydilər. Lakin onlar bundan imtina etdilər. Birbaşa müqavilə imzalamaq istəyirdilər. Biz isə bununla razılaşmadıq. “Xəzər Lənkəran” cari mövsüm heyətinə qatdığı bütün legionerləri ilk növbədə baxışdan keçirir. Ona görə də xorvat və serb futbolçuların gəlişi baş tutmadı. İndi onların əvəzinə başqa futbolçuların yolunu gözləyirik. Onlar da Avropadandırlar”.