Veteran futbolçu ağır durumda, kömək edən yoxdur

Sakit Alıyev Tovuz futbolunun ən tanınan simalarından sayılır. Müstəqillik dövründə uzun illər doğma "Turan"ın şərəfini qoruyub, bu klubun heyətində çempion olub, ölkəmizi ilk dəfə avrokuboklarda təmsil edib. Bütün ömrü boyu doğma klubuna sadiq qalan Alıyev futbolçu karyerasını bitirdikdən sonra "Turan"da baş məşqçi kimi çalışıb. Elə məşqlərin birində də huşunu itirərək yerə yıxılıb.

Artıq 4 ildir ağır xəstəlikdən əziyyət çəkir. Onun ölkə xaricində müalicəsi mümkündür. Lakin təəssüf ki, ailəsinin buna maddi imkanı çatmır. Qardaşı Vəkil Alıyevin gücü isə ayda-ildə bir dəfə Gürcüstana aparıb-gətirməyə çatır.

S.Alıyevin müalicəsi ilə bağlı müvafiq qurum və şəxslərə edilən müraciətlərə isə istənilən cavab verilməyib.

S.Alıyevin yaxınları ümid edir ki, Tovuzun imkanlı şəxsləri, Tovuz futbolunun yetirmələri, futbol adamları və AFFA rəhbərliyi bir vaxtlar milli komandamızda da oynamış Sakit Alıyevin sağlamlığına qovuşmaslı üçün gücləri çatan köməyi edəcəklər.