“Qəbələ” AZAL-la oyunun hazırlıqlarını davam etdirir

Azərbaycan Premyer Liqasının XXVII turunda istirahət edən “Qəbələ” növbəti oyunun hazırlıqlarını davam etdirir. Futbolxeber.az-ın məlumatına görə, martın 28-də əvəzedici komanda ilə yoxlama oyunu keçirib, 7:2 hesabı ilə qalib gələn Roman Qriqorçukun yetirmələri artıq 2 gündür XXVIII turun AZAL-la görüşünün hazırlıqlarına başlayıb. Yoxlama matçının ertəsi məşq edib, ardınca bir günlük istirahət edən komanda çalışmalarını Qəbələdə davam etdirir. Gündə bir dəfə hazırlıq keçən “qırmızı-qaralar”ın məşqlərində yalnız zədəli Dodo iştirak etmir. Azərbaycan millisinin düşərgəsindən qayıdan Cavid Hüseynovla Ruslan Abışov, U-21-dən qayıdan Tellur Mütəllimov da məşqlərə qatılır. Zədə səbəbindən bir müddət fərdi hazırlıq keçən Elvin Camalov da artıq komandaya qoşulub.

Növbəti iki gündə də doğma məkanda məşq edəcək “Qəbələ” aprelin 3-dəki hazırlığın ardından Bakıya yollanacaq. XXVIII tur çərçivəsində AZAL-la səfər görüşündən bir gün əvvəl komanda paytaxtda məşqə çıxacaq. Oyunöncəsi son məşq qarşılaşmanın baş tutacağı Şüvəlandakı “AZAL Arena”da baş tutacaq.

Qeyd edək ki, AZAL - “Qəbələ” oyunu aprelin 5-də keçiriləcək.