Akif İsmayılov: “Azərbaycan - Malta oyununa 20 mindən çox azarkeş gələcəyinə inanıram”

“Malta ilə oyunun Respublika stadionunda keçirilməsi barədə qərarı AFFA rəhbərliyi qəbul edib. Burada baş məşqçi amili də var. Görünür, Robert Prosineçki özünü daha çox azarkeş önündə göstərmək istəyir”. Futbolxeber.az-ın məlumatına görə, bu sözləri Tofiq Bəhramov adına Respublika stadionunun direktoru Akif İsmayılov deyib.

“ATVxəbər”ə açıqlama verən Akif İsmayılov Azərbaycan - Malta oyununun bilet satışından da söz açıb: “Bu gün səhər maraqlandım və məlum oldu ki, 8 minə yaxın bilet satılıb. Bizdə azarkeşlər adətən oyun günü daha çox bilet alırlar. Ona görə də inanıram ki, sabah stadionda 20 min, bəlkə də daha çox azarkeş toplaşacaq”.