“Neftçi”nin futbolçusu: “Qol vurduqdan sonra nə edəcəyimi bilmirdim"

“Neftçi”nin yarımmüdafiəçisi Samir Məsimov “Xəzər Lənkəran”la oyundan sonra Futbolxeber.az saytına müsahibə verib.

- Ardıcıl 2 uğursuz oyundan sonra “Neftçi” nəhayət ki qələbə qazandı. “Xəzər Lənkəran”a qarşı baş tutan görüş barədə nə deyə bilərsən?

- Bizim üçün vacib oyun idi. Bu qarşılaşmanı bizim üçün dönüş nöqtəsi hesab etmək olardı. Çünki 2 oyun idi ki, qələbə qazana bilmirdik. İstəyirdik ki, bu matçda qələbə qazanmaqla uğursuzluğa son qoyaq. Belə də oldu. Çox mühüm qələbə qazandıq. Psixoloji cəhətdən də bizə yalnız qələbə lazım idi.

- Düşünmək olar ki, bu qələbədən sonra “Neftçi” “qara zolaq”dan çıxacaq?

- Məşqlərdə tam gücümüzlə çalışırıq ki, hər şey qaydasında olsun. İnanıram ki, bu qələbənin ardı gələcək. Məqsədimiz odur ki, “Neftçi” öz yerinə, layiq olduğu birinci pilləyə qayıtsın.

- Hazırda “Neftçi”nin zirvəyə yüksəlmə nə dərəcə realdı?

- Liderlik üçün mübarizə aparmağa 100 faiz hazır deyilik. Çünki “Qarabağ”la aramızda xal fərqi çoxdu. “Qarabağ” AZAL üzərində də qələbə qazandı ki, bu, bizim üçün pisdi. Amma onlarla qarşıda 2 oyunumuz var. Çalışacağıq ki, “Qarabağ”a çataq. Təslim olmayacağıq. Sona kimi mübarizə aparacağıq.

- Qələbəyə baxmayaraq, “Neftçi” “Xəzər Lənkəran”la oyunda elə də parlaq çıxış etmədi. Bunun səbəbi nədir?

- Uşaqlar narahat idilər. Hər kəs bilirdi ki, bu oyunda komandaya mütləq qələbə lazımdır. Psixoloji cəhətdən də bir qədər axsayırdıq. Ümid edirəm ki, bu qələbədən sonra yalnız irəli gedəcəyik.

- “Xəzər Lənkəran”ın qapısına qol vurduqdan sonra ehtiyat oyunçular skamyasına tərəf qaçdın. Bunu necə izah edə bilərsən?

- Çoxdandır ehtiyatda qalırdım. Qol vurduqdan sonra özümü itirdim, nə edəcəyimi bilmirdim. Ona görə də ehtiyat oyunçular skamyasına tərəf qaçdım.

- Bunu baş məşqçi Arif əsədova mesaj kimi qəbul etmək olar?

- Yox, yox. Mənim işim meydana çıxıb, oyunumla əsas heyətə layiq olduğumu göstərməkdir.

- Necə düşünürsən, bu qoldan sonra növbəti turda “Qəbələ”yə qarşı baş tutacaq oyunda start heyətində yer ala biləcəksən?

- Buna baş məşqçi qərar verəcək. Mən məşqlərdə formada olduğumu göstərməliyəm ki, məşqçi mənə inansın və şans versin.