“Qəbələ” “Sumqayıt”la oyuna Bakıda hazırlaşır

Azərbaycan Premyer Liqasının XVII turu çərçivəsində dekabrın 18-də Sumqayıtda eyniadlı komanda ilə üz-üzə gələcək “Qəbələ” matçın hazırlıqlarına start verib. Futbolxeber.az-ın məlumatına görə. ötən turdan (“Qəbələ”-“Qarabağ” 2:1) sonra bir gün istirahət edən, ardından isə Bakıya üz tutan “qırmızı-qaralar” dekabrın 16-dan məşq prosesini bərpa edib. Hazırlıqlarını paytaxtda keçən “Qəbələ” istirahətdən sonra ilk məşqini ADBTİA-nın stadionunda keçirib. Məşqə əməliyyat olunan Ruslan Əmircanovla yanaşı, zədəli Viktor Mendi və Vladimir Levin də qatılmayıb. Bu gün də Bakıda məşq edəcək komanda matçın hazırlığını “Bayıl Arena”da tamamlayacaq.

Qeyd edək ki, dekabrın 18-də Sumqayıtdakı “Kapital Bank Arena”da baş tutacaq “Sumqayıt” - “Qəbələ” qarşılaşması saat 15:00-da başlayacaq.