“Neftçi”nin ən yaxın izləyicisi ilə oyuna böyük maraq: 4 minə yaxın bilet satılıb

Azərbaycan Premyer Liqasının VII turu çərçivəsində keçiriləcək “Neftçi” - “Sabah” oyununa böyük maraq var.

Futbolxeber.az saytının məlumatına görə, artıq qarşılaşmaya 4 minə yaxın bilet satılıb. Görüşün hələ iki gün sonra keçirəcəyini nəzərə alsaq, bu rəqəmin daha da artacağı şübhə doğurmur.

Xatırladaq ki, qiyməti 2, 3, 15, 20 manat olan biletləri “Neftçi”nin mobil tətbiqindən və https://bilet.neftchi.az saytından onlayn şəkildə əldə etmək mümkündür.

Stadionun kassasında isə biletlər oyun günü saat 14:00-dan etibarən satışda olacaq.

Xatırladaq ki, oktyabr 9-da “Palms Sports Arena”da keçiriləcək qarşılaşma 19:30-da start götürəcək.

6 turdan sonra “Neftçi” 15 xalla Azərbaycan Premyer Liqasının lideri, eyni xala malik “Sabah” isə onun ən yaxın izləyicisidir.