“Millimiz Norveçlə oyunda yaxşı nəticə qazansa, Mahmud Qurbanov niyə də postunda qalmasın?”

“Futbolda hər bir nəticə mümkündür. Amma mən komandamıza inanıram. Ümid edirəm ki, yığmamız bu gün Norveçlə oyunda yaxşı nəticə qazanacaq”. Futbolxeber.az saytına verdiyi müsahibədə bu sözləri “Qəbələ”də forma geyən, hazırda zədədən əziyyət çəkdiyinə görə yığmadan kənarda qalan Ruslan Əmircanov deyib.

Təcrübəli futbolçu millidəki baş məşqçi dəyişikliyi məsələsinə də toxunub: “Bundan əvvəl bəziləri deyirdi ki, Foqtsa görə uduzuruq. Amma açıq danışmaq lazımdı. Hər şeyi məşqçinin üzərinə atmaq düzgün olmazdı. Biz futbolçularda da günah var. Meydanda oynayan məşqçi yox, bizik. İndi isə milli Mahmud Qurbanova tapşırılıb. Onun insan kimi necə birisi olduğunu hamı bilir. Futbolçu kimi də böyük uğurlar qazanıb. Azərbaycanda onun qədər çempion olan ikinci futbolçu yoxdu. Məşqçi də təcrübəsi var. Ola bilər ki, millimiz Norveçlə oyunda uğur qazansın. Millimiz Norveçlə oyunda yaxşı nəticə qazansa, Mahmud Qurbanov niyə də postunda qalmasın? Futbolçuları çox yaxşı tanıyır, oyunçuların psixologiyasına bələddir. Üstəlik, doğma dilimizdə danışır”.

Əmircanov millidə əhval-ruhiyyənin yüksək səviyyədə olduğunu qeyd edib: “Hazırda millidə olmasam da, mütəmadi olaraq komanda üzvləri ilə əlaqə saxlayıram. Komandada əhval-ruhiyyə çox yüksəkdir. Uğur qazanmaq da futbolçuların özündən asılıdır. Meydana inanaraq çıxmaq lazımdı. Estoniya millisi Norveçə qalib gəlirsə, biz də bunu təkrarlaya bilərik”.