“Araz Naxçıvan”ın dağılmasına imkan verilməməliydi”

Regional Futbol Federasiyasının prezidenti, veteran futbolçu İskəndər Cavadov Sportpress.az saytına açıqlamasında “Araz Naxçıvan” klubunun milli çempionatdan imtina etməsinə münasibət bildirib. Futbolxeber.az-ın məlumatına görə, o, qeyd edib ki, Naxçıvan təmsilçisinin dağılmasının qarşısı alınmalıydı: “Debütant komandanın çempionatdan imtinası pis haldı. Bu xəbəri oxuduğum zaman inanmadım. Amma klubun rəsmən çempionatdan imtina etməsi təsdiqlənəndə çox pis oldum. Biz Gəncə, Tovuzda klublara dəstək olmaq istəyirik. Milli çempionatda isə belə hal baş verir. “Araz Naxçıvan”ın bu hala düşməsi azarkeşlərə təsirsiz olmayacaq. Sən gəlirsən komandana dəstək olursan, sonra deyirlər ki, artıq komanda olmayacaq”.

Cavadovun sözlərinə görə, klubun dağılması maliyyə problemiylə əlaqədar ola bilər: “İş adamları artıq klublara milyonlar xərcləyəndə yüz dəfə düşünür. Hamıya məlumdur ki, Azərbaycanda sponsorlar futboldan qazana bilmir. Iş adamları isə ardıcıl pullar xərcləyir. Nəticədə nə vaxtsa rəhbərliyin maliyyə problemi üzə çıxır və komandası fəaliyyətini dayandırır. Çox pis haldı Azərbaycan futbolu üçün. Naxçıvan klubunun ola bilər maliyyə problemi olub. Başqa ciddi səbəb görmürəm. Axı oyunda problem olsa belə mübarizəni dayandırmaq olmazdı. Tovuz, Gəncə klubları premyer liqada yoxdu. İndi isə Araz Naxçıvan iştirakını dayandırdı. “Bakı” klubunun problemləri olduğu deyilir. Deməli, maliyyəsi stabil olan klublarımız azalır və sabah başqa komanda çempionatda iştirak etmək imkanında olmaya bilər”.