Saşa Stamenkoviç: “Sırf limitə görə ehtiyatda qaldığımı demək olmaz”

“Mənim meydana çıxmamağım problem deyil. Emil Balayev də “Neftçi”nin futbolçusudur. O da meydana çıxmalıdır”. Futbolxeber.az saytına verdiyi açıqlamada bu sözləri “Neftçi”nin qapıçısı Saşa Stamenkoviç deyib.

Son turlar ehtiyatda qalan serb qolkiper bunun limitlə bağlı olduğunu düşünmür: “Sırf limitə görə ehtiyatda qaldığımı demək olmaz. Qərarı baş məşqçi qəbul edir. O da hazırda Emilin qapını qorumasını istəyir. Mən bunda hansısa problem görmürəm”.

“Vəziyyət dəyişməsə, hansı qərarı qəbul edəcəksən” sualını Stamenkoviç belə cavablandırıb: “Deməli, qismət belədir. Əldən heç nə gəlmir. Emil gənc qapıçıdır. Hazırda yaxşı formadadır. Mən də ona dəstək oluram”.

Stamenkoviç azarkeşlərə minnətdarlıq edib: “AZAL-la oyunda azarkeşlər mənim üçün banner açmışdılar. Buna görə çox sevindim. Onların dəstəyini hiss etmək çox xoşdur. “Neftçi” azarkeşləri növbəti dəfə sübut etdilər ki, onlar Azərbaycanda 1 nömrədirlər”.