AZAL-da klubdaxili iclas keçirildi

Bu gün “Qəbələ” ilə qarşılaşacaq AZAL-da klubdaxili iclas keçirilib. Futbolxeber.az-ın klubun rəsmi saytına istinadən verdiyi məlumata görə, klub rəhbərliyi komandanın məşqçi, futbolçu və texniki heyəti ilə görüşüb.

Klubun vitse-prezidenti Fikrət Hüseynov matç ərəfəsində futbolçuların hazırlığı ilə maraqlanıb. Hüseynov ilk 2 turda qeydə alınan uğursuz nəticələrə baxmayaraq futbolçulara inandığını bildirib: “Futbolçuların potensialının olduğunu bilirik. Onu da anlayırıq ki, komandanın heyəti yenidən qurulub. Ancaq artıq toparlanmaq vaxtıdır. İlk 2 oyundakı nəticələri unudub bu matçdan qələbənin təməlini qoymaq vacibdir. Rəhbərlik olaraq bütün futbolçulara güvənir və sizin komandanı layiq olduğu yerlərə çıxaracağınıza inanırıq”.

Ardınca baş məşqçi Tərlan Əhmədov söz alıb. Gənc mütəxəssis rəhbərliyin göstərdiyi etimadı doğrultmağa borclu olduqlarını bildiriərək ən yaxın zamanda vəziyyətin düzələcəyini qeyd edib. Baş məşqçi futbolçulardan Qəbələ səfərində qələbənin təməlinin qoyulmasını istəyib.