Karlos Kordosa: “Belqraddakı səhvlərimizi təkrarlamamalıyıq”

“Sabah bizi çox vacib oyun gözləyir. Bu, təkcə klub yox, həm də futbolçuların özü üçün böyük önəm kəsb edir”. Futbolxeber.az-ın məlumatına görə, bu sözləri “Neftçi”nin aparıcı üzvü Karlos Kordosa deyib.

“Partizan”la oyun öncəsi mətbuat konfransında iştirak edən braziliyalı müdafiəçi ilk dəfə bu cür mühüm oyunda meydana çıxacağını qeyd edib: “Daha əvvəl avrokuboklarda bu cür yüksək səviyyəli oyunda iştirak etməmişəm. Odur ki, matç mənim də böyük əhəmiyyət kəsb edir. Məqsədimiz uğur qazanmaqdı. Bunun üçün əlimizdən gələni edəcəyik”.

Kordosa ilk oyunda 2 komanda yoldaşının avtoqol müəllifi olmasını belə şərh edib: “Həmin anları şərh etmək çətindir. Çünki bu, sırf epizoddan aslıdır. 1 avtoqol vurulması normaldı. Amma 2 avtoqol olması artıq sürprizdi. Oyuna baxdım. Müdafiəçilər pis təsir bağışlamadılar. Sadəcə, bəxt bizim tərəfdə olmadı. Ona görə bayaq da vurğuladım ki, oyuna tam konsentrasiya olaq. Oradakı səhvlərimizi təkrarlamamalıyıq”.