“Simurq” rəsmisi: "AFFA-nın qərarından şikayət edib-etməyəcəyimiz hələ bəlli deyil"

“Simurq”un AFFA İntizam Komitəsi tərəfindən 4 oyunluq cəzalanan Draqan Çerana görə Appelyasiya və Ekspert Komitəsinə şikayət edib-etməyəcəyi hələ bəlli deyil. Bu haqda Futbolxeber.az saytına Zaqatala klubunun mətbuat xidmətinin rəhbəri Rüstəm Allahverdiyev məlumat verib: “Hazırda klub rəhbərliyi bu barədə müzakirələr aparır. Yekun qərar hələlik verilməyib. Rəhbərlik şikayət edilməsi barədə qərar versə, bunu ictimaiyyətə açıqlayacağıq”.

“Rəhbərlik futbolçu ilə bu barədə müzakirə aparıbmı” sualını klub rəsmisi belə cavablandırıb: “Təbii ki, klub rəhbərliyi Çeranla bu haqda danışıb. Futbolçu günahsız olduğunu deyir. O bildirib ki, həmin epizodda topu saxlaya bilmədiyi üçün əsəbləşib. Bu zaman ağzından çıxan ifadəni isə hakim özünə götürüb. Halbuki o cür sözdən futbolçular oyun zamanı tez-tez istifadə edirlər”.