Böyükağa Hacıyev: “Bakıda meydana fərqli "Neftçi" çıxacaq”

“Neftçi”nin baş məşqçisi Böyükağa Hacıyev Avroliqanın play-off mərhələsinin ilk oyununda səfərdə “Partizan”a 2:3 hesabı ilə uduzduqları qarşılaşmanı şərh edib. Futbolxeber.az-ın məlumatına görə. Hacıyev cütün taleyinə Bakıda aydınlıq gələcəyini bildirib: " 2:0 hesabı ilə irəlidə olmağımıza baxmayaraq, məğlub olduq. Futboldur. Ötən gün mətbuat konfransında demişdim ki, maraqlı oyunun şahidi olacaqsınız. Bir oyunda 5 qolun vurulması matçın necə gərgin keçməsindən xəbər verir. Bir neçə oyunçumuzun olmaması müdafiədə boşluqlar yaratmışdı. Bir həftə sonra Bakıda meydana fərqli "Neftçi" çıxacaq. Səfərdə vurulan 2 qol bizim xeyrimizə işləyəcək. "Partizan" vəziyyətdən çıxış yolunu hökmən irəli atılmaqda görəcək. Biz də çalışacağıq ki, bundan maksimum yararlanaq".